 |
| गजलकार ~ तिब्बत दर्लामी |
काभ्रे, साल्धारा
कस्तो हुन्छ मारुनीमा कम्मर भाँच्न सिकाईदेउन ।
लौन लाफा मलाई पनि हुर्रा नाँच्न सिकाईदेउन।
रातैभरी रोधीघरमा सालैजोको भाका टिपी
दोहोरीमा पिरतीको नाता गाँस्न सिकाईदेउन ।
कौडा टप्का घाटु नाच्दै मोहोनीले लठ्याएर
मुटूभित्र आफ्नोपनको माया टाँस्न सिकाईदेउन ।
कतिराम्री सुहाएको तिम्लाई घलेक गुन्यु चोली
मलाई भाँग्रा कछाडमा मीठो हाँस्न सिकाईदेउन ।
न त भाषा न त भेष म त रित्तो रित्तो भएँ
सँस्कृतिमा रमाएर जीवन् बाँच्न सिकाईदेउन।
नोट:
लाफा :–मगर भाषाबाट साथी
मारुनी, हुर्रा :– पूर्वेली मगरहरुले नाच्ने नाच
कौडा, टप्का, घाटु :– पश्चिमेली मगरहरुले नाच्ने नाच
भाँग्रा, कछाड :- मगर पूरुषले लगाउने पहिरन
गजल
No comments:
Post a Comment